Wednesday, May 25, 2016

Gul hoti hui sham e tamanna ko jila

Ya Sahibuz Zamaan (atfs)

Gul hoti hui sham e tamanna ko jila
 
1. Insaan ki fitrat ko  yu shaitaan hawa de
Har sarkash e islaam ko jeene ka maza de
2. T.V se Mobile se inhe waqt kaha hy
Bachcho ko khuda aisi balao se bacha de
3. Asha'ar-e-aqeedat ko raqam karne se pahle
Quran se ay sheikh aqeede ko saja de
4. Ek baap pe wazib hy ke bete ko bitha kar
Qaim(as) ke bataye huwe aqwaal padha de
5. Murtad huwe jate hy har ek qaum ke baasi
Ab mere khuda lashkare mehdi ko bana de
6. Jo log samajhta hy hidayat pe hami hy
Quran ke waris unhe quraan suna de
7. Emaa'n nazar aata nahi dunya me kahi par
Nazro ko meri jalwa e emaan dekha de
8. Salwaat ki aawaz uthe jashn me aise
Soyee huwe Momin ka muqaddar jo jaga de
9. Kar khatm ye duniya ke masael to bahut hain
Ab thoda bahut shaan me mehdi ke suna de
10. Allah hame aaj duaoo'n ka sila de
Ab parday e gaibat ko zamane se hata de
11. Ab jalwa e mahdi hame Allaah dekha de
Gul hoti hui sham e tamanna ko jila de
12. Narjis ke gulistaa'n me gulab aisa khila hy
Chubhte huwe kaanto'n ko jo gulzar bana  de
13. Hy aaj wiladat mere maula ki jaha me
Ay saqi mujhe jaam e wila aa ke pila de
14. Aamaal agar neema e shaban me karle
Aamil ko amal kiyo na ibadat ka maza de
15. Gaibat me imamat ka karam aise hy jaise
Duniya ko pas e abr bhi khurshid ziya de
16. Mil jaye agar izne khuda mahdiye dee'n ko
Zalim ke har ek zulm ki bunyaad hila de
17. Mauood agar ghaiz me aa jaye khuda ka
Har dushman e islam ki hasti ko mita de
18. Ay ibne hasan askari talwaar utha kar
Zalim ki banayee huwee sarkaar gira de
19. Muddat se tamanna ye mere dil me rahi hy
Mahdi ka ay Allah tu deedar kara de
20. Zeeshan ne Qaim(as) ka qasida jo likha hy
Har sher pe mabood use khoob jaza de
✍ Zeeshan Azmi