Tuesday, May 10, 2016

Shabbir aagaye hai alamdar chahiye

🌹1. Deen e khuda ko aaj madadgaar chahiye
Qayem imam e asr ki sarkaar chahiye

🌹2. Batil khayal phir se zamane me aa gaye
Ab shayeri ko hamd ke Ashaar chahiye

🌹3. Zahar e dagha ugal diya fanoos e deen ne
Ab mimbar e rasool ka haqdaar chahiye

🌹4. Shaitan ke shikanje me apne hi phans gaye
Bhai ko aaj bhai wafadaar chahiye

🌹5. Tayyar ho gaya hun qasidey ke waste
Mujh par khuda ka lutf lagataar chahiye

🌹6. Aaqa ke sath sath wafadaar chahiye
Ibne Ali ko fauj ka sardar chahiye

🌹7. Ibne Ali ka jashn manane ke wasate
Mehfil me bas durood ki bochaar chahiye

🌹8. Jab manqabat hussain ki aa jaye samane
Har ek zameer sunne ko bedaar chahiye

🌹9. Khamosh hy zamaana burayee pa har jagah
Haq bolne ko misam e tammar chahiye

🌹10. Pamaal kar rahe hy jo maqsad hussain ka
Unke zawaal ke liye mukhtaar chahiye

🌹11. Is daur ke yazid ka takhta palat de jo
Duniya me ek aisa azadaar chahiye

🌹12. Ghera hy har taraf se hukumat ne deen ko
Phir aaj ibne hydar e qarrar chahiye

🌹13. Bhai ka pyar kaisa ho bhai se is liye
Abbas aur Hussain ka shahkaar chahiye

🌹14. Bazar e bot parast me hame ek baar phir
Khushnodiy e khuda ka kharidaar chahiye

🌹15. Ta hashr jo uthaye bina haath ke alam
Mojiznuma jaha'n ko woh jarrar chahiye

🌹16. Parcham khuda ke deen ka karbal me gaadne
Shabbir aagaye hai alamdar chahiye

🌹17. Batil khayal sar na uthaye isi liye
Zeeshan tujh ko lafzo ki talwaar chahiye

✍ zeeshan aazmi

No comments:

Post a Comment

Your comments are appreciated and helpful. Please give your feedback in brief.