Friday, July 29, 2016

Islam SARBALAND hua Karbala ke baad


Kashti chalaye kon bhala na khuda ke baad

Hoti hai qadr jaan ki lekin qaza ke baad

Ye raaz faash aaj huwa muddato ke baad

Islam SARBALAND hua Karbala ke baad

✍ Zeeshan Azmi

Gadir-e-khum me to maula abuturaab bana

Gadir-e-khum me to maula abuturaab bana

Ali ko chodh ke har aadmi kharab bana
Ali ka zikr kiya jis ne wo nawab bana

Labo pe aayee haqeeqat to ek baat kaho
Ali ke naam se insaan kaamyaab bana

Ali ki madha me hum ne uthayee jab bhi qalam
Khuda ke fazl se har sher la jawaab bana

Kiya Ali ki itaa'at to yu huwa hai asar
Jaha gaya mai waha mohtaram janab bana

Mujhe saqifa se ZEESHAN wasata hi nahi
Gadir-e-khum me to maula abuturaab bana

✍ Zeeshan Azmi

Dahr me bhai ki ulfat fatema sugra se hai

Karbala me aarzoo akbar ki ek baba se hai

Kya ziyarat ka sharaf phir mujh ko humsheera se hai

Is haqeeqat se koi inkaar kar sakta nahi

Dahr me bhai ki ulfat fatema sugra se hai

✍ Zeeshan azmi

Ek ungali se dare khaibar utha achcha laga

*Ek ungali se dare khaibar utha achcha laga*

Saare aalam me Ali sa rahnuma achcha laga
Ya Ali mushkil kusha jisne kaha achcha laga

Jab pukara hai nabi ne ya Ali aajayeye
Sath paigamber ka maula ne diya achcha laga

Justojo thi har kitabo se magar taarikh me
Mai ne jab nahjul balagah ko padha achcha laga

Yu to mulla zikr karte hai Ali ka har ghadi
Par Ali walo ke lab se tazkera achcha laga

Maine dekha hy kitabo me bahut alqaab ko
Ya Ali tera laqab shere khuda achcha laga

Naaz marhab ko bohut tha apni taqat par magar
Ek ungali se dare khaibar utha achcha laga 

Naam likh kar log ukta jate hy apna magar
Ya Ali Zeeshan ne jab bhi likha achcha laga

✍ Zeeshan azmi

Few maqabat and qata

Achche ashaar sunao to Payamber ke liye
Zeb deta hai yahi sahibe mimber ke liye

Ya Ali ya ali kahna mere maula ke liye
Baaese fakhr bana misam o qamber ke liye

Sar uthate hai munafiq ye jahalat ke sabab
Gaibate kubra se aa jaiyey takkar ke liye

Husne akhlaaq sikhaya hai nabi ne tum ko
Nek aamaal karo shafiye mahshar ke liye

Kharch in ko na karo faaltu bakwason me.
Khalq alfaz hue midhat e Haider ke liye

Manqabat likhkhi hai zeeshan ne jo aaj ke din
Is ka har sher hai khushnodiye dawar ke liye
________________________________
Chata ke dhool zalim ko, giraa ke sultanat uski
Hussain ibne ali ne zulm ki auqaat batlai

Kiya na maa ki izzat na kiya izzat bahan ki tu
Abu sufyaan ke pote tu hai shaitaan ka  bhai
________________________________

Sab musalma karbala se shaam tak khamosh the
Aur saidaaniyo par zulmo sitam hota raha

Chand jaise hi muharram ka falak par aa gaya
Dushmane dee ke kaleje me waram hota raha

Jab khalifa samane aayaa Ali ke haar kar
Choor khud hi Sharm se Sar ta qadam hota raha
______________________________

RUBAIE:

Shia nahi kufe ka ke rooposh rahu'n
Islam ho badnam mai khamosh rahu'n

Mujh se na ulajhna ay Yazid e doura'n
Zishan hun is wastey purjoush rahu'n

شیعہ نہیں کوفہ کا کہ روپوش رہوں
اسلام ہو بدنام میں خاموش رہوں

مجھ سے نہ الجھنا اے یزیدِ دوراں
ذیشان ہوں اس واسطہ پرجوش رہوں

✏ zeeshan azmi

Sab ko ghame shabbir ki daulat nahi milti

*Sab ko ghame shabbir ki daulat nahi milti*

Tareekh me bemisl shahdat nahi milti
Sarwar ne ki jo dee'n ki nusrat nahi milti

Raazi ho khuda jisse zamane me ay logo
Shabbir si koi bhi fazilat nahi milti

Aamaal pe ek baar nazar daal lo apne
Hur jaisi jaha walo ko qismat nahi milti

Abbas ki haibat se sabhi bhaag gaye the
Lashkar ko qareeb aane ki jur'at nahi milti

Masoom ki jo shaks itaa'at nahi karta
Usko kabhi Aamal me barkat nahi milti

Chahre se sabhi log Azadaar hai lekin
Sab ko ghame shabbir ki daulat nahi milti

Momin ke aqidey pe jo ilzaam lagaye
Zeeshan usey dahr me izzat nahi milti

✏ zeeshan azmi

Monday, July 25, 2016

Sadiq ke gham me gumbade khazra udaas hai

*Sadiq ke gham me gumbade khazra udaas hai*

1. Gham me chate imam ki chahra udaas hai
Hum hi nahi akele hain dunya udaas hai

2. Zahre dagha se ibne Mohammad huwe shahid
Is gham se kul qabilaye hamza udaas hai

3. Bachche yateem ho gaye baqir ke laal ke
Rahlat huwi jo baap ki kumba udaas hai

4. Aisa asar huwa hai ke jafar ke baad me
Har taalib-e-uloom ka tabqa udaas hai 

5. Ahle aza nahi hain faqat muztarib yaha
Sadiq ke gham me gumbade khazra udaas hai

6. Zeeshan kya bataye zamaane ke zulm se
Ab tak baqe'e aur madina udaas hai

غم میں چھٹے امام کے چہرہ اداس ہے
ہم ہی نہیں اکیلے ہیں دنیا اداس ہے

زہرِ دغا سے ابنِ محمد ہوئے شہید
اس غم سے کُل قبیلۂ حمزہ اداس ہے

بچّے یتیم ہو گئے باقر کے لال کے
رحلت ہوئی جو باپ کی کنبہ اداس ہے

ایسا اثر ہوا ہے کہ جعفر کے بعد میں
ہر طالبِ علوم کا طبقہ اداس ہے

اہلِ عزا نہیں ہیں فقط مضطرب یہاں
صادق کے غم میں گنبدِ خضرا اداس ہے

ذیشان کیا بتائے زمانہ کے ظلم سے
اب تک بقیع اور مدینہ اداس ہے

✍ Zeeshan Azmi

Friday, July 22, 2016

Puche ka'abe se koi azmate haider kya hai

Shaq hai deewar bhala dekho to manzar kya hai
Ye to Allah ko maloom ke chakker kya hai

Raaz mauloode haram ka ye baya kardega
Puche ka'abe se koi azmate haider kya hai

✍ zeeshan aazmi

Jaan sau baar ho qurbaan abutalib par

🌹 QATA 🌹

Ghar me hai inke risalat ka imamat ka diya
Fakhr kiyo na kare insaan abutalib par

Ek ek qatra laho ka baha hai karbal me
Jaan sau baar ho qurbaan abutalib par

Bandh kar sar pe kafan qabr se wo niklenge
Jis ka imaan hai zeeshan abutalib par

✍Zeeshan Aazmi

Lazim khuda ke baad payamber ka zikr hai

Islam me rasool ka hyder ka zikr hai
Inki zuba pe khaliq-e-akbar ka zikr hai

Zeeshan mustufa ki ita'aat hai hukm-e-rab
Lazim khuda ke baad payamber ka zikr hai

✍Zeeshan Aazmi

Tuesday, July 19, 2016

Lohu rolaati hai ham ko shahaadat e Hamza

*Lohu rolaati hai ham ko shahaadat e Hamza*

🌹1. Hy bemisal zamane me azmate hamza
Khuda hi jaane ke kya hai shuja'ate hamza

🌹2. Kalame kufr baka shane mustufa me jab
Abu jahal pe huwa waare hazrate hamza

🌹3. Khuda ki raah me utba ko qatl kar dala
Yahi thi badr me umda ibadate hamza

🌹4. Khuda ka sher hai, sher-e-rasool hai hamza
Ye aasmaano pe likhkhi hai midhate hamza

🌹5. Nikala cheer ke seena kaleja hinda ne
Ohad me yu huwee pamaal mayyate hamza

🌹6. Majaal kis ki thi jo aata rubaru iske
Daghe ke sath huwee hai shahadat e hamza

🌹7. Na chedo zikre ohad dil udaas hota hai
Lohu rolaati hai ham ko shahaadat e Hamza

🌹8. Laho se seencha hai deen e khuda ka yu gulshan
Mahakti aaj bhi ZEESHAN nusrate hamza

✍ zeeshan aazmi

Sunday, July 17, 2016

Baqe'e ab bhi shikasta hai al-ajal maula

Al-ajal Maula

🌷1. Suna hai hum ne jo tareekh ne bataya hai
Janab-e-Zahra pe zalim ne zulm dhaya hai
Nabi ka tohfa tha baage fidak wo khaya hy
Ali ka cheen ke haq takht par jo ayaa hai

Na jaane kaisa zamana hai al-ajal maula
Sabaq har ek ko sikhana hai al-ajal maula

🌷2. Rasool e paak ko achcha sila diya tumne
Baqi e Aal e nabi munhadim kiya tumne
Har ek musalma ko badnam kar diya tumne
Yazeedo tum pe ho lanat ye kya kiya tumne

Musalma ja ba ja ruswa hai al-ajal maula
Dilo ka haal bhi khasta hai al-ajal maula

🌷3. Hame satate he shaitaa ki god ke paale
Nabi ki aal ki qabrein ujaadne wale
Sabhi pe rab ki hai lanat sabhi ke dil kaale
Nahi darenge laeeno se hum Ali wale

A'doo e deen satata hai al-ajal maula
Nishane qabr mitata hai al-ajal maula

🌷4. Na jaane kis ki shariat pe log chalte hai
Hamara qabr pe jana ye shirk kahte hai
Nabi ki aal ki qabro pe zulm karte hai
Magar banate hai turbat jo inke marte hai

Inhi ka khel tamasha hai al-ajal maula
Inhi ka qabr pe pahra hai al-ajal maula

🌷5. Sitam hai saudi arab ka áyaa zamane par
Giraya roza-e-zahra bagair kauf-o-khatar
Nahi khayal kisi ka, nahi kisi ka hai dar
Unhe khabar nahi aayega ek mard-e-zafar

Tere zahoor ka charcha hai al-ajal maula
Hamara tujh pe bharosa hai al-ajal maula

🌷6. Hamare fe'l se zeesha'n nahi khuda razi
Zara batao kahi hai sile raham baaqi
Gunah karte hai har din bade bade haaji
Kahi pe zulm ki aandhi kahi dagha baazi

Badal raha ye zamaana hy al-ajal maula
Baqe'e ab bhi shikasta hai al-ajal maula

✍ zeeshan aazmi

Monday, July 11, 2016

La Raib Tu Jahaan Ka Parwardigaar

La Raib Tu Jahaan Ka Parwardigaar Hy

🌹1. Hamd e khuda me gardishe lail o nahar hy
La Raib Tu Jahaan Ka Parwardigaar Hy

🌹2. Chahe kare azaab tu chahe kare raham
Ay Malik e jaha ye tera akhtiyar hy

🌹3. Meri Hayat O Maut Ebadat Namaz Bhi
Sab Is Ke Wasate Jo Mera Kirdegaar Hai

🌹4. Tazeemi sajda kahke wali ko karo na tum
Sajda fakat Khuda ke liye saazgaar hai

🌹5. Kiyo hum kare na shukr khudaye jahan ka
jis ke karam se ghar me hamare bahar hy

🌹6. Mayusiyat me kaise giriftaar honge ham
Hamko Khuda ki zaat pe jab e'tebaar hai

🌹7. Pardah kiya hy tune, mere har gunah par
Sattariyat pe teri ye jaane nisaar hy

🌹8. Gherey huwe hai ranj o alam har taraf mujhe
Zaat e Khuda pe fir bhi mujhe itebaar hy

🌹9. Shahwat ke saath aql bhi rakhte hain jo bashar
Insaan ki qataar me unka shumar hy.

🌹10. Talib hain maghferat ke ay ghaffar ya ghafoor
Makhlooq e kainaat pe isyaa'n ka baar hy

🌹11. Makhlooq kalq karta hy tu roz ek nayee
Tu khud hi jane kya teri shan o waqar hai

🌹12. Sare husain walo ki rooho ko paak kar
Ay Rab hamara nafs badi ka shikaar hy

🌹13. Dil khol kar gunah ay insaan kar yaha
Bachkar khuda se gar koi jaye faraar hy

🌹14. Gairo ke dar pe sar ko jukate ho kis liye
Taqseem e rizq sirf khuda ka she'aar hai

🌹15. Ay rabbe do jahaan duayee'n qabool kar
Zeeshan tera aasi ebadat guzaar hy   

✍ zeeshan aazmi

Ho raha hai aaj bhi zehra ki turbat par sitam

*Ho raha hai aaj bhi zehra ki turbat par sitam*

🌹1. Zindagi me bhi raha juzwe risalat par sitam
Baade rahlat bhi huwa hai gaahe mayyat par sitam

🌹2. Aaj firqa-wariyat ki den hy jis ke sabab
Ho raha hy mustufa ki ek ummat par sitam

🌹3. Unsiyat jis mitti se thi wo rulati hy mujhe
Gardish e halaat ne dhaya muhabbat par sitam

🌹4. Wo gawahi ka talab karna bhare darbar me
Hakime darbar ka hy saaf ismat par simat

🌹5. Qabro ko mismaar karna ye bhala kaisa jihad
Na samajh ye to hai paigamber ki sunnat par sitam

🌹6. Ye shahadat deti hy atraaf ki mitti hame
Ho raha hai aaj bhi zehra ki turbat par sitam

🌹7. Munhadim zalim hukumat ne kiya hy jo baqe'e
Dar haqeeqat hy musalmano ki jannat par sitam

🌹8. Baade paygamber huwa hy ye saqifa ka asar
Aaj bhi zeeshan hota hai wilayat par sitam

✍ zeeshan aazmi

Wednesday, July 6, 2016

Rozedaro ke liye yaume masarrat eid hai

🌹1. Sohbat e jahil se bachne ki alamat eid hy
Aalime dee'n ke liye roze qayamat eid hy

🌹2. Jab kabhi kahta ho dil se Ya Ali Maula Ali
Bilyaqee'n mere liye wo din wo saa'at eid hy

🌹3. Har musalma jaan le ahle tashayyu ke liye
ta qayamat roze e'laane wilayat eid hy

🌹4. Zindagi jisne guzaari ta'ate Allah me
Maut un ke wasate ek dar haqeeqat eid hai

🌹5. Aasheqane murtuza ki nazro se gar dekhiye
Saal me baara imamo ki wiladat eid hai

🌹6. Chod de nafrat ki baatein chod firqa wariyat
Aaj qaumo ke liye ta'meere wahdat eid hai

🌹7.  Kiyo nahi bachta hy nafarmani e khaliq se tu
Jab ke har din nafs ki karna hifazat eid hy

🌹8. Itrat o quran ka daman agar ho saath me
Maut ho ya zindagi dono tabiy'at eid hy

🌹9. Marefat Allah ki gar ho gayee ramazan me
Rozedaro ke liye yaume masarrat eid hai

🌹10. Ye dua karta ho rab se parday e ghaibat hatey
Asl me ZEESHAN mehdi ki ziyarat eid hy

✍ Zeeshan Azmi